Friday, April 19, 2013

Zharbdrung Kuchoe


ཞབས་དྲུང་རིན་པོ་ཆེའི་སྐུ་མཆོད།
རང་ཟླ་ ༣ པའི་ཚེས་ ༡༠།

ལོ་བསྟར་ཧོར་ཟླ་ ༣ པའི་ཚེས་ ༡༠ ལུ་ ང་བཅས་རའི་འབྲུག་གི་བསྟན་པའི་
བདག་པོ་ སྐྱབས་མགོན་གོང་མ་ཞབས་དྲུང་ངག་དབང་རྣམ་རྒྱལ་མཆོག་དགོངས་
པ་ཆོས་དབྱིངས་ལུ་གཤེགས་པའི་སྐུ་མཆོད་ཀྱི་དུས་ཆེན་ཨིན།

དེ་ཡང་མགོན་པོ་དངོས་གྲུབ་བྱུང་བའི་རྒྱུད་ལས། འཁོར་བའི་བདུད་རྣམས་
འཇོམས་པ་པོ། །རྡོ་རྗེ་སེམས་དཔའ་མཉམ་གྱུར་པའི། །རྡོ་རྗེ་སློབ་དཔོན་བདག་
ཉིད་ཆེ། །ཞེས་མཐུ་ཆེན་ཆོས་ཀྱི་རྒྱལ་པོ་འདི་ཉིད་ཀྱི་ མཚན་གསལ་ལུང་བསྟན་
དང་འཁྲིལ་ཏེ་ ཞབས་དྲུང་རིན་པོ་ཆེ་ངག་དབང་རྣམ་རྒྱལ་འདི་ ཡབ་དཔལ་ལྡན་
འབྲུག་པའི་གདུང་རྒྱུད་དྲི་མ་མེད་པ་མི་ཕམ་བསྟན་པའི་ཉི་མ་དང་ ཡུམ་བསོད་
ནམས་དཔལ་གྱི་བུ་ཁྲིད་གཉིས་ཀྱི་སྲས་ལུ་ སྤྱི་ལོ་ ༡༥༩༤ རབ་བྱུང་ ༡༠ པའི་
ཤིང་རྟ་ཟླ་ ༡༡ ཚེས་ ༡༡ ལུ་ ལྟས་བཟང་སྣ་ཚོགས་པའི་ཐོག་ལས་ ཀུན་མཁྱེན་
པདྨ་དཀར་པོའི་ཡང་སྲིད་འཁྲུལ་མེད་དུ་སྐུ་འཁྲུངས་ནུག།
དགུང་ལོ་ཆུང་བའི་སྐབས་ལས་ ཡབ་དང་མཁས་གྲུབ་ལྷ་དབང་བློ་གྲོས་
ལ་སོགས་པའི་ ཡོངས་འཛིན་དམ་པ་ཚུ་གི་སྐུ་མདུན་ལས་ གཞུང་རིག་གནས་
དབང་ལུང་མན་ངག་ལ་སོགས་པའི་ གསན་བསམ་མཐར་ཕྱིན་ཏེ་ མཁས་གྲུབ་ཀྱི་
བདག་ཉིད་ཆེན་པོར་གྱུར་པའི་ཤུལ་མར་ གདན་ས་ར་ལུང་གི་དཔལ་ལྡན་འབྲུག་
པའི་སེང་གེའི་ཁྲི་ལུ་མངའ་གསོལ་མཛད་ནུག།

དེ་ལས་ ཆོས་ཀྱི་རྒྱལ་པོ་རང་ཉིད་ དགུང་གྲངས་ཉེར་གསུམ་གྱི་ཐོག་ སྤྱི་ལོ་
༡༦༡༦ རབ་བྱུང་ ༡༠ པའི་མེ་ཕོ་འབྲུག་ལོ་ལུ་ ལས་མགོན་བྱ་རོག་གདོང་ཅན་གྱི་
ལུང་བསྟན་དང་བསྟུན་ཏེ་ ཆིབས་ཁ་ལྷོ་ལུ་བསྒྱུར་ཏེ་བྱོན་ཞིནམ་ལས་ཚུར་ ལྷོ་མོན་
སྨན་ལྗོངས་ཀྱི་རྒྱལ་ཁབ་འདི་ནང་ ཆོས་སྲིད་གཉིས་ལྡན་གྱི་གཞུང་འགོ་བཙུགས་ཏེ་
དཔལ་ལྡན་འབྲུག་པའི་རྒྱལ་ཁབ་ཟེར་ རྒྱ་བོད་ཧོར་གསུམ་ལ་སོགས་པའི་འཛམ་
གླིང་ནང་ ཡོངས་གྲགས་ཅན་གྱི་རྒྱལ་ཁབ་ཅིག་ལུ་བཟོ་གནང་ནུག།
དེ་ལུ་ ངན་སེམས་ཕྲག་དོག་གི་དབང་ལས་བྱུང་བའི་ ཕྱི་རོལ་དངོས་ཅན་མི་
ཡི་དགྲ་བོ་སྡེ་སྲིད་གཙང་པ་དང་ དགེ་སོག་དམག་དཔུང་གི་ཕྱོགས་ཐམས་ཅད་
ལས་རྒྱལ་བ་མ་ཚད། ནང་གི་དགྲ་སྡེ་བླ་མ་ཁག་ལྔའི་ཕྱོགས་ལས་རྣམ་པར་རྒྱལ་
བ་དང་ གསང་བའི་དགྲ་སྡེ་དངོས་མེད་ལྷ་མ་སྲིན་སྡེ་བརྒྱད་ཀྱི་ཕྱོགས་ཐམས་ཅད་
ལས་ཀྱང་རྣམ་པར་རྒྱལ་ཏེ་ གདན་ས་ལྕགས་རི་དང་ གསང་སྔགས་ཟབ་དོན་ཕོ་
བྲང་ལས་བཟུང་སྟེ་ རྒྱལ་ས་སྤུངས་ཐང་བདེ་ཆེན་ དབང་འདུས་ཕོ་བྲང་ ཐིམ་ཕུག་
བཀྲིས་ཆོས་རྫོང་ སྤ་རོ་རིན་ཆེན་སྤུངས་རྫོང་ དར་དཀར་བཀྲིས་ཡང་རྩེ་ ཀྲོང་
གསར་ཆོས་འཁོར་རབ་བརྟན་རྩེ་ ལ་སོགས་པ་བཞེངས་ཏེ་ ལྷོ་མོན་ཁ་བཞིའི་
རྒྱལ་ཁབ་འདི་ནང་ སངས་རྒྱས་ཀྱི་བསྟན་པའི་ཉི་མ་ ཤར་བར་མཛད་གནང་ནུག།
དེ་ལས་ རྗེ་རང་ཉིད་དང་དབྱེར་མེད་པའི་ དབུ་མཛད་བསྟན་འཛིན་འབྲུག་
རྒྱས་ལུ་ ཆོས་སྲིད་ཀྱི་བསླབ་བྱ་ཞལ་གདམས་བཀའ་ཆེམས་ཀྱི་ཚུལ་དུ་ ཡོངས་
སུ་རྫོགས་པར་བསྩལ་ཏེ་ དཔལ་ལྡན་འབྲུག་པའི་རྒྱལ་ཁབ་ཀྱི་སྡེ་སྲིད་ཆེན་མོར་
བསྐོས་གནང་ཞིན་ན་ རེ་ཞིག་གདུལ་བྱ་རྟག་འཛིན་ཅན་ཚུ་གི་ངོ་ལུ་ ཆོས་ཀྱི་རྒྱལ་
པོ་རང་ཉིད་ དགུང་གྲངས་ལྔ་བཅུ་ང་བརྒྱད་ སྤྱི་ལོ་ ༡༦༥༡ རབ་བྱུང་ ༡༡ པའི་
ལྕགས་ཡོས་ ཟླ་ ༣ པའི་ཚེས་ ༡༠ ལུ་ ཐུགས་དམ་རིམ་གཉིས་ཀྱི་རྣལ་འབྱོར་
ལུ་བཞུགས་གནང་ནུག།

ཞབས་དྲུང་རིན་པོ་ཆེའི་སྐུ་མཆོད་དུས་ཆེན་ཉིན་མར་ གཞུང་འབྲེལ་ངལ་གསོ་
བཞག་དགོ་མི་འདི་ ཞབས་དྲུང་རིན་པོ་ཆེ་གིས་ ང་བཅས་ར་ལྷོ་མོན་ཁ་བཞིའི་
རྒྱལ་ཁབ་འདི་ དཔལ་ལྡན་འབྲུག་པའི་རྒྱལ་ཁབ་ཡུག་གཅིག་ལུ་བཟོ་སྟེ་ ཆོས་
སྲིད་གཉིས་ལྡན་གྱི་གཞུང་འགོ་བཙུགས། རྒྱལ་ཁབ་ཀྱི་རང་དབང་སྲ་བརྟན་དུ་
བཟོ་གནངམ་ལས་ཚུར་ འབྲུག་རྒྱལ་ཁབ་འདི་ རང་དབང་རང་བཙན་གྱི་རྒྱལ་
ཁབ་འབད་དེ་ བདེ་སྐྱིད་གཉིས་ལྡན་གྱི་ངང་ལུ་སྡོད་ནི་ཡོད་མི་འདི་བྱུང་ཡོདཔ་ལས་
བརྟེན་ ཞབས་དྲུང་རིན་པོ་ཆེ་འདི་ འབྲུག་རྒྱལ་ཁབ་དབུ་བརྙེས་པར་མཛད་པའི་སྐུ་
དྲིན་སྦོམ་ཡོད་མི་འདི་ ག་ར་གིས་རྗེས་དྲན་ཞུ་དོན་ལུ་ཨིན།

དེ་འབད་ནི་འདི་གིས་ དུས་ཆེན་འདི་གི་སྐབས་ལུ་ ག་ར་གིས་ཞབས་དྲུང་
རིན་པོ་ཆེ་ལུ་ ཕྱག་མཆོད་གསོལ་འདེབས་ལུ་བརྩོན་དགོཔ་ག་ནི་ལས་གལ་ཆེཝ་
མ་ཚད་ ཞབས་དྲུང་རིན་པོ་ཆེ་ལུ་གསོལ་བ་རྩེ་གཅིག་ཏུ་བཏབ་སྟེ་ཐུགས་དམ་
བསྐུལ་བ་ཅིན་ རང་རང་སོ་སོ་དང་ལྷག་པར་རྒྱལ་ཁབ་ནང་ལུ་ རྐྱེན་བར་ཆད་མི་
འབྱུང་བར་བྱིན་གྱིས་བརླབས་ཏེ་ རྒྱལ་ཁབ་ཀྱི་བསྟན་སྲིད་ཡུན་རིང་གནས་ནི་གི་
རྟེན་འབྲེལ་ཡོདཔ་ཨིན།

4 comments:

comment and help me to go further

Comments System

Disqus Shortname